Hamatan Roda Polítika bá Objetivu Estadu RDTL

HAMATAN RODA POLÍTIKA BÁ OBJETIVU ESTADU RDTL: 

Kampaña polítika motór ba hakonu povu no sosiedade timorense nia direitu

Observasaun ba aktu palku polítiku halo ita hanoin.  Ita reflekte no ita sei deside.  Ita deside iha loron 12 fulan Maiu iha tinan ida ne'e.

Ha'u hanoin sira hot-hotu (líder ativu sira: Kay Rala Xanana GusmãoKay Rala Xanana Gusmão, Marí Alkatiri, Jose Ramos Horta, Lere, no líder nasionál sira seluk) koalia polítika durante kampaña, ba eleisaun antisipada, iha hela koridór nia laran.  Liuliu bá figura sira ho "xapeo" Comando da Luta (CL) no Fundadór. Basá xapeo ne'e taka banati bá ida-ida nian kompeténsia maibé iha interdependénsia bá malu.  Bainhira ita koalia konà fundadór la sees hosi CCF/FRETILIN-FALINTIL, no nune'e mós kargu CL la dook hosi CCF/FRETILIN-FALINTIL.  Ita toka prinsípiu kauzalidade.  Nune'e, sasán lós hela.

Líder ativu sira koalia tuir sira ida-idak nia dalan, nune'e hanorin demokrasia popular, maibé ita sira hamriik tuir tenke defini ho loloos no justu hodi bali no tane, no hateke dook liutan.  Ikus-mai, hili no fó votu konfiansa liu hosi eleisaun bazeia ba universál, livre, diretu, sekretu, pesoál no periódiku.

Kestaun maka ita, dala balun ho kompeténsia natón no konesimentu limitadu, ho hanoin banati bá sistema demokrátiku iha era estadu modernu no kontemporaneia.  Katak harii estadu ida tenke hahú ho forma plataforma polítiku, ne'ebé la'os seluk maka organizasaun polítika ka diakliu bolu Partidu Polítiku.  Partidu Politiku ho objetivu maka atu ba ukun no ezekuta planu hodi hakonu estadu no povu nia direitu.  Biar nune'e, banati ba prinsipiu, valor, no programa ne’ebé partidu ne’e define tiha ona haktuir bá órgaun diretivu partidu nian.

Sasan baralla tanbá kahór diskursu polítiku ho realidade sósiu-kultura; ema koalia polítika, seluk hatan ho sentimentu. Rua ne'e la iha dalan para bele hakát hamutuk duni.  Maibé, ida ne'e maka demokrasia ála konseitu jurídiku-polítiku osidentál ne'ebé mundu odota, inklui RDTL - Repúblika Demokrátika Timór-Leste.

12.05.2018 (7am-3pm), iha Eleisaun Antisipada, votasaun maka povu fó valór bá ida ne'ebé maka merese sira fó hakabaas forsa polítiku hodi hetan konfiansa polítika no lejitimidade atu realiza no ezekuta programa hodi bá priense objetivu estadu RDTL.

Mezmu nune'e, órgaun eleitorál kompetense tenke iha supervizaun no koordenasaun diak ba malu nafatin hodi asegura la iha infrasaun eleitoradu to'o bainhira Tribunál Rekursu anúnsia rezultadu hosi EA 2018.  Nune'e, ita kumpromitidu nafatin ba norma demokrasia no respeitu ba RDTL nia órgaun sira hotu.  Nune'e de'it maka ita bele manan konfiansa eleitór ordináriu ba iha prosesu ezersíziu demokratizasaun sistematizadu no ho lejitimidade.

Ita atu remata de'it ho EA, Partidu ka koligasain ida sai vensedór iha kompetisaun EA?  La'e.  Kna'ar no resposabilidade morál, polítiku no plataforma akordu partidaria ne'ebé sai kontratu sosiál hodi konkore bá árgaun lejislativu aas liu, tenke ezekuta ho sistematiku, bein organizadu no koordenadu no iha banati nafatin ba prinsípiu Estadu Direitu Demikrátiku hodi hakonu kompetensia ne'ebé Lei Fundamentál hatuur tiha ona, atu liuliu hakonu objetivu estadu no objetivu ideolójiku-polítiku luta ba libertasaun nasaun no povu.  Formula polítiku ida ne'e tenke sai sasukat ba ema hotu, polítiku hothotu no sosiedade tomak.

Viva Povu Eroíku.  Viva RDTL - Repúblika Demokrátika Timór-Leste.